Маринадата ја подготвуваме така што циметот, пиментот, белиот пипер, мелениот ким, солта и шеќерот ги мешаме со лимонот и грчкиот јогурт. Во неа ги ставаме надкопаните и ги маринираме околу 8 часа.
Тавчето, обложено со хартија за печење го обложуваме со кромидот и лукот. Одозгора ги ставаме парчињата сланина и додаваме слој од маринираните надкопани. Постапката ја повторуваме уште еднаш, а одозгора ставаме уште еден слој сланина. Врз тавчето ставаме уште едно тавче, во коешто ставаме потежок предмет што не гори. Тавчето го ставаме во рерна и печеме на 180 °C околу 90 минути. Течноста, којашто настанува во текот на печењето, ја собираме во шолја. Пред крајот на печењето горното тавче го притискаме надолу, за да го истиснеме вишокот течност и сланината и пилето да се залепат. Вишокот течност го истураме и печеме уште околу 50 минути за да се запече убаво сланината.
Додека се пече месото го подготвуваме тестото за лепчињата. Во сад го дробиме квасецот, додаваме малку топла вода, лажица брашно и шеќерот. Кога квасецот ќе нарасне, им го додаваме на останатите состојки за леб и замесуваме тесто. Тестото го покриваме со фолија и го оставаме да стаса, додека количината не се зголеми за двапати. Тестото го делиме на делови со тежина од околу 100 гр. и секој го расукуваме во форма на круг, со дебелина од околу половина сантиметар. Во тавчето за печење, обложено со хартија за печење, ги печеме во рерна на 200 °C околу 4 минути од едната страна, кога ќе се надујат, ги превртуваме и ги печеме уште околу 2 минути.
Печените надкопани ги ставаме во загреан сад, од сокот што го зачувавме во текот на печењето, кромидот и лукот подготвуваме сос. Ако има многу течност, најнапред ја вариме за да се згусти, а потоа сосот заедно со кромидот и лукот го миксираме.
Сендвичот Гиро го составуваме така што надкопаните фино ги сечеме, ги ставаме во пресеченото лепче и ги преливаме со сосот.

Рецептот го приготви Бригита Мајчен Пеклар.

Рецептот е од книгата „Мириса на дома“